علم الحمّص و اللّوبيا في حيثيّات انبثاق الماسونوفوبيا

الماسونيّة كمفهوم هيّ مفهوم حديث و مبهم في الخيال الشّعبي التّونسي, لكن هل مفهوم دخّل في العديد منّا غولة و ولاّ جزأ لا يتجزّأ من نظريّة المؤامرة الكبرى اللاّ في كلّ محضر لازم يعملولها إسقاط و كأنّ الافراد ما عندهمش دخل في آش يجرالهم


 بداية ننصحكم تنزلوا هنا بش تحطّوا رواحكم في الجوّ العام للموضوع متاعنا و يكون التّأثير اشدّ على نفسيّاتكم و ان لم تضغط على الرّابط قد تصاب بحمّى الماسونوفوبيا

ذات ليلة بهيمة(الكلمة لهنا لازم تتفهم على مفهومها العربي الأصلى درءا للمغالطات اللاّ قد تأوّل كلامي لاغلراض ماسونيّة) و انا ندور في دهاليز الفايسبوك, طحت على فيديو ذات عنوان يغريك بش تفتحها و تطّلع على خفاياها, و هاي الفيديو :

الحقيقة الدّامغة للماسونيّة في تونس(احذر فيديو قد تغيّر حياتك)ا
  
, نزلت على البوتون بلاي و بديت نتفرّج و شدّتني حكّة في صدري قبل ما تبدى الفيديو ما كنتش نعرف سببها, لكن بعد ما تعدّات الدّقيقة الأوّلة كان ما ولّيت نرعش و اكتشفت ارّضيّتي الماسونيّة الشّنيعة و كيفاش كنت ننتمي ال جماعة لا تريد سوى الخراب لهذا العالم, اي نعم كلّ من يحكّ او يمسّ صدره فهو ماسونّي للنّخاع, و تلك الحركة هي شعار للتّعارف بين الماسونيّين(امّا مازلت مانيش نتأكّد خاصّة بالماسونيّين التّونسيّين كاهو ولاّ اشارة عالميّة كيما اشارات الصمّ و البكم), ولّيت نرعش و نبكي و بديت نتوجّس ريبة من ايدي لا تمشي في حركة لا اراديّة في اتّجاه صدري في العلن و ترصّيلي ناكل في طريحة اب اسم محاربة الماسونيّة
نعمل هكّا و نقرّر بش نزيد نخوض في موضوع الماسونيّة التّونسيّة, بما انّي ما كنت نعرف عل الماسونيّة كان عن طريق مجموعة فيديوات القادمون اللاّ خلاّتني نعدّي ليالي نخمّم العمارة اللاّ ساكن فيها مبنيّة اب طريقة تعدّي طاقة الخير ولاّ الشرّ للسّماء(و اللّه أعلم وين ولاّ علاش طالعة هل طاقة للسّماء) , و اذا بيّا نلقى روحي ماسونّي من الصّنف أ, اللاّ ما فيهمش علاج, و قد تتساءلوا كيفاش؟ و فمّا الخبراء منكم في الماسونيّة بش يكبتوها و هيّ طايرة ... اي نعم نحبّ الجبن طوابع مثلّثات ... سامحوني لحظة قاعد نبكي متأثّر, اللّه غالب شيّ أقوى منّي ...اي نعم ملّي صغير لازمني كلّ نهار كعبة جبن في شكل مثلّث بش انّجم نعدّي نهاري في كامل قواي العقليّة سينون عين حوروس ما تلقيش اب ضوّها عليّ, و نعدّي نهاري المثلّثات الكحل دايريين بيّا, وقد اشتهرت بحبّي للبريك الماسّوني خاصّة في شهر رمضان لكن بعد ما تاكّدت راو ماسونّي قرّرت مقاطاعته

 الصدمة الكبري نعم البريك الذي نتناوله منذ عقود هو خطة ماسونية حقيرة لتمييع الشعب ولمن يجهل معني كلمة بريك : كلمة بريك بالفرنسية تعني ياجورة التي تستعمل فالبناء فهل هذه مجرد صدفة؟

و منذ اطّلاعي على هل علم ولّيت نشوف الماسونيّة في كلّ مكان و زمان, و بديت نحلّل في كلّ حاجة نشوفها و نربط في الخيوط ببعضها و علاقتها بالماسونيّة و المسلاّت الفرعونيّة, فلا يغيب على عين خبير مثلي راو منقالة الآفيني فوقها شعار ماسونّي, و نطالب الحكومة الحاليّة اسقاطها اب اسم الشّعب

ولاّ المعاهد التّحضيريّة للعلوم الهندسيّة, اذ لا يخفي على أحد راو الهندسة هيّ أمّ و منبع الماسونيّة(و ذلك من خلال شعارهم الكوس و البركار, اللاّ للأسف نملك منهم فل دار  و نقرى في معهد تحضيري *كريز أخرى متاع دموع, سامحوني*) لذلك من موقعي السّامي هذا و بحكم اطّلاعي على آش نقراو من نظريّات في هل معاهد, انّجم انأكّد راهم يزرعوا فينا الأرضيّة الماسونيّة بش يستغلّونا بعد في نشرها في المجتمع و الأبعاد الشرّيرة و الظّلاميّة ... ستنّى ها جيتك ... للمؤامرة الماسونيّة للسيطرة على العقول البشريّة


و زادة لاحظت, بعد بورقيبة اب الماسونيّة الحديثة في تونس, راو زالابا(الزّين بور لي زانتيم) كان زادة ماسوني لكن اب درجة اقلّ, و طلع عليه الغنّوشي في سلّم الماسونيّة, هاكا لاش زالابا كان يحطّ ايده على صدره مل برّا امّا الغنّوشي كان يدخّل فيها تحت الفيستة, و اكّدتلي مصادر راو الغنّوشي كان يصرفق في زالابا شرّ تصرفيق بالكفّ في المحافل الماسونيّة

لكن يبدو انّ قوّات الخير و الشّعب انتصر مؤخّرا على الماسونيّة في تونس, على خاطر اليوم في خطاب الرّئيس المبزّع, ماقامش اب حكّ صدره ولاّ قرّب ايده منّو, و بذلك نكونو ربحنا معركة في صراعنا الأزلي ضدّ الماسونيّة في بلاد البربر و نحنا نحاربو فيها ملاّ جابتها علّيسة ال تونس(هاذي اكّدهالي الباجي قايد السّبسي قلّك يثبت على علّيسة جات و عملت آكل الحركة الماسونيّة بعد ما هزّت الأرض اب جلد ثور في شكل مثلّث), و هذاكا علاش تونس عل خريطة على الشّكل الآتي 

 
و نخلّيكم مع فيديو قد ابكت الملايين من هول الصّدمة(و اذا كانك عندك اعراض الماسونوفبيا التطرّفيّة ننصحك ما تتفرّجش) : وائل غنيم, راعي الماسونيّة في مصر

  و الفيديو التّالية قد تغيّر حياتك الى الأبد : غير منصوح بها لأصحاب القلوب الضّعيفة
 
و أدعو كلّ من يريد الذّهاب الى ال المدرسة العليا لعلوم الاعلاميّة بمنّوبة أن يعدل عنها على خاطرها بأرة الماسونيّة في البلاد و هذا اللاّ تأكّده الفيديوات التّالية :

المدرسة الوطنية لعلوم الماسونية 
المركب الماسوني بمنوبة 

و مازالت القائمة طويلة و نذكر منها منظّمة الآتوج المشبوهة ذات الأرضيّة الماسونيّة اللاّ جابولنا منها وزرة قاللنا عليهم الغنّوشي راهم تكنوقراطات لكنّي نؤمن راو ذلك مجرّد غطاء لادخال الماسونيّة بقوّة فل بلاد, و هذا على سبيل الذّكر لا الحصر

 و توّ شدّتني الرّعشة و كريز متاع ماسونوفوبيا دونك بش نخلّيكم  و نمشي نلوّج على شويّ مثلّثات بالقوقل آرث نحطّهم فالفايسبوك لانقاذ الشّعب التّونسي

و السّلام

بي.آس : هنا صفحة تمكنك من إجراء التحاليل اللازمة للتئكد من عدم إصابتك بالماسونية