يا تونسي يلّي غبّنوك
يا تونسي يلّي خنقوك
يا تونسي يلّي سرقوك
اخرج بيع الدّخان المسروق لا يشدّوك
انصب بيه في قمرق الحبيب بورقيبة
و بيع ساشيات شامبيون في برشلونة
و الموليناكس و الطّناجر و مناقل الرّولاكس
يا تونسي يلّي سجنوك
يا تونسي يلّي ما خلّوكش تنصب فالاماكن العامّة
ماعاش ثمّة شرطة بلديّة
الشّرطة هربت
الشّرطة هربت
برّا انصب في فريب باب بحر
و علّق الحوايج عل بوتووات و البلايك
و عيّط عل سولد
سولد اب مناسبة الثّورة
و استغني و اشري الآي.فون
يا تونسي يلّي ضربوك
يا تونسي يلّي سرقوك
اللاّ عندك معاه مشكلة قلّو ديقاج
احرقلو دارو و اضربلو مرتو
و قيّد على ميليشيات التجمّع
اعمل فيها باندي و اللاّ تحبّ براكيه
حتّى الجيش ما يحكيش معاك
الشّعب معاك
الشّعب راهو حرّ
و بن علي هرب
بن علي هرب
يا تونسي يلّي ظلموك
يا تونسي يلّي سكّتوك
اعتصم بش يزيدوك فل شهريّة
و تلقى باش تعدّي السّهريّة
اعتصم باش يرسّموك
و تنجّم تكركر فالخدمة و تجي روتار
يا تونسي يلّي نرفزوك
كانك عامل عركة مع عرفك
قلّو ديقاج و خرّجو بالمشطة
يا تونسي يلّي جوّعوك
باب العرش تحلّ
باب العرش تحلّ
و انت اليوم حرّ
فان لم تستحي فافعل ما شئت
امّا ما تنساش راك تونسي
و راو شعار الجمهوريّة
يبدى بالنّظام قبل الحرّية و العدالة
-ايّ تشابه فالأحداث او الافعال ليس سوى من محض خيال الكاتب
ليست هناك تعليقات:
إرسال تعليق